சுற்றியிருக்கும் சூழலை அனுமானியுங்கள், நடத்தைக்குப் பங்களிக்கும் சாத்தியமான தூண்டுதல்களை அடையாளம் காணுங்கள். துன்பத்தை ஏற்படுத்தக்கூடிய சத்தம், வழக்கத்தில் ஏற்படும் மாற்றங்கள் அல்லது பூர்த்திச் செய்யப்படாத தேவைகள் போன்ற காரணிகள் எதுவும் உள்ளனவா எனப் பாருங்கள். 

நடத்தையைத் தூண்டும் விஷயங்களை நீங்கள் கண்டறிந்ததும், அதை நிவர்த்தி செய்ய உடனடியாக நடவடிக்கை எடுங்கள். உதாரணமாக, உரத்த சத்தங்கள் கிளர்ச்சியை ஏற்படுத்துகிறது என்றால், உங்கள் அன்பிற்குரியவரை அமைதியான இடத்துக்கு அழைத்துச் செல்லுங்கள் அல்லது அவர்களின் சூழலில் நிலவும் சத்தத்தின் அளவைக் குறைத்திடுங்கள். மாற்றாக, உங்கள் அன்பிற்குரியவர் பொது இடத்தில் ஆடைகளை அவிழ்க்கத் தொடங்கினால், அவர்களின் ஆடை அல்லது சுற்றுச்சூழல் காரணிகள் அவர்களுக்கு அசௌகரியத்தை அளிக்கின்றனவா என்பதை அறியுங்கள். 

முதுமைக்கால மறதி நோயுடன் வாழும் நபருடைய மற்றும் அவரைச் சுற்றியுள்ளவர்களுடைய பாதுகாப்பிற்கு முன்னுரிமை கொடுங்கள். நடத்தை தீங்கு விளைவிக்கும் அபாயத்தை ஏற்படுத்தினால், உடனடி அச்சுறுத்தல்கள் விளைவிக்கும் விஷயங்களை அகற்றி பாதுகாப்பான சூழலை உறுதிப்படுத்த நடவடிக்கை எடுங்கள்.  

நடத்தையானது உங்கள் அன்பிற்குரியவருக்கு உடனடித் தீங்கு எதையும் விளைவிக்கவில்லை என்றால், சம்பந்தப்பட்ட மற்றவர்களின் பாதுகாப்பையும் கண்ணியத்தையும் உறுதிப்படுத்துங்கள். உதாரணமாக, உங்கள் அன்பிற்குரியவர் சுற்றியுள்ள யாரேனும் ஒருவரை நோக்கி தகாத நகர்வுகளை மேற்கொண்டால், அந்தச் சூழ்நிலையைச் சமாளிக்க அவர்களை ஒரு தனிப்பட்ட இடத்திற்குப் அமைதியாக அழைத்துச் செல்லுங்கள். சாத்தியமான இடங்களில், நீங்கள் உறுதியான மற்றும் மரியாதைக்குரிய முறையில் எல்லைகளைத் தெளிவாக அறிவித்திட வேண்டும், மேலும் அவர்களின் நடத்தை ஏற்றுக்கொள்ள முடியாதது என்பதை அவர்களுக்குத் தெரியப்படுத்துங்கள். நீங்கள், “அன்புக்கூர்ந்து நிறுத்துங்கள். பிறரின் ஒப்புதல் இல்லாமல் நீங்கள் அவர்களைத் தொடக்கூடாது”, என்று சொல்லலாம். 

பதட்டமான சூழ்நிலைகளைத் தணிக்க, உன்னிப்பாக கேட்பதையும் அங்கீகரிக்கும் நுட்பங்களையும் பயிற்சி செய்யுங்கள். உங்கள் அன்பிற்குரியவருடன் வாதிடுவதற்குப் பதிலாக, அவர்களின் நடத்தை உங்களுக்கு அசாதாரணமானதாகவோ பொருத்தமற்றதாகவோ இருந்தாலும் கூட, அவர்களின் உணர்வுகளை ஏற்றுக்கொள்ளுங்கள்.  

உதாரணமாக, உங்கள் அன்பிற்குரியவர் குடும்ப ஒன்றுக்கூடலின்போது, அங்கு நிலவக்கூடிய சத்தம் மற்றும் செயல்பாட்டினால் உணர்ச்சி வசப்பட்டு, ஆக்ரோஷமடைந்து கத்த ஆரம்பித்தால், நீங்கள், “இங்கே மிகவும் சத்தமாக இருக்கிறதென்று எனக்குத் தெரியும், அமைதியாக இருக்கும் இன்னொரு அறைக்கு உங்களை அழைத்துச் செல்கிறேன்”, என்று கூறுங்கள். 

தேவைப்பட்டால், தூண்டுதல் அளிக்கும் விஷயங்கள் அல்லது சூழ்நிலையிலிருந்து உங்கள் அன்பிற்குரியவரின் கவனத்தைத் திசைதிருப்ப இதமான திசைதிருப்பல் நுட்பங்களைப் பயன்படுத்துங்கள். இசைக் கேட்பது, கைவினைச் செயல்பாடுகள் அல்லது குடும்பப் புகைப்பட ஆல்பங்களைப் பார்ப்பது போன்ற மனதை அமைதிப்படுத்தும் மற்றும் ஈடுபட வைக்கும் மாற்று நடவடிக்கைகள் அல்லது கவனத்தைத் திசைதிருப்ப வைக்கும் செயல்களில் அவர்களை ஈடுபட வையுங்கள்.

இருப்பினும், அந்த முறையற்ற நடத்தை நீடித்தால், குறிப்பாக அது சுயஇன்பம் போன்ற பாலியல் இயல்புடையதாக இருந்தால், அந்த நபரை மிகவும் தனிப்பட்ட பகுதிக்கு மெதுவாக அழைத்துச் செல்லுங்கள். இது உங்கள் அன்பிற்குரியவரின் தனியுரிமை மற்றும் கண்ணியத்தைப் பராமரிக்கும் அதே வேளையில் விவேகமான மற்றும் மரியாதைக்குரிய அணுகுமுறையை அனுமதிக்கிறது.